Cymorth i'r ardaloedd arbrofi
Ym mis Mehefin 2007, lansiodd yr Ysgrifennydd Gwladol dros Waith a Phensiynau ardaloedd arbrofi'r Strategaeth Dinasoedd yn y Confensiwn O Fudd-dal i Waith. Roedd hyn yn arwydd i'r ardaloedd arbrofi symud ymlaen i'r cam cyflawni.
Ar yr un pryd, lansiodd yr Ysgrifennydd Gwladol y Rhwydwaith Dysgu sydd â'r nod o gefnogi'r gwaith o rannu syniadau ac arfer da, ysgogi meddwl newydd a helpu i ddiwallu anghenion cyfathrebu'r ardaloedd arbrofi.
Bydd yr ardaloedd arbrofi yn cael arian a hyblygrwydd gan y Llywodraeth i wireddu eu huchelgeisiau. Ar 2 Ebrill 2007, cyhoeddodd yr Ysgrifennydd Gwladol y byddai'r ardaloedd arbrofi yn cael:
- rheolaeth uniongyrchol ar £32 miliwn o Gronfa Ardaloedd Difreintiedig y Llywodraeth unwaith y cytunwyd ar y targedau
- rôl allweddol wrth lywio'r gwaith o gyflwyno rhaglen flaenllaw'r Llywodraeth sef Llwybrau at Waith i helpu pobl i roi'r gorau i gael Budd-dal Analluogrwydd
- manteisio ar well prosesau rhannu data
- mwy o allu i ddylanwadu ar y gwaith o ddarparu cyfleoedd hyfforddiant a rhaglenni cyflogaeth yn lleol
- arian gwobrwyo ychwanegol posibl os byddant yn llwyddo i gyflawni eu targedau i gael pobl i ddychwelyd i'r gwaith.
Targedau
Rydym wedi cytuno gyda'r ardaloedd arbrofi i leihad o 3 y cant yn nifer y bobl sydd ar fudd-daliadau a chynnydd cyfatebol mewn cyflogaeth. Caiff ffigurau manwl gywir eu pennu'n derfynol ar gyfer y targed budd-daliadau, gyda rhywfaint o gyd-drafod terfynol ar y targed cyflogaeth. Yna byddwn yn cefnogi'r ardaloedd arbrofi i gyflawni eu targedau lleol.
O ganlyniad, mae'r ardaloedd arbrofi sydd wedi cyrraedd y cam terfynol yn cael rhywfaint o'r Gronfa Ardaloedd o Amddifadedd.
Y cynnig i'r Ardaloedd Arbrofi
Nid oes a wnelo'r Strategaeth Dinasoedd ag arian newydd yn bennaf. Mae a wnelo â gwneud defnydd gwell o'r buddsoddiad presennol ym maes cyflogaeth a sgiliau yn lleol. Fodd bynnag, mae tair ffordd y gall DWP gyfrannu arian at y Strategaeth Dinasoedd.
- Sicrhaodd DWP £5 miliwn o arian 'sbarduno' i ddechrau ar y gwaith o ddatblygu consortia, gan helpu i adeiladu capasiti, dwyn ynghyd bartneriaid a chefnogi cynllun y broses gynllunio. Arian a delir ymlaen llaw i ardaloedd arbrofi'r strategaeth dinasoedd yw arian 'sbarduno' er mwyn ysgogi gwaith y consortiwm lleol, gan roi cymorth yn ystod ei ddatblygiad a'i gam gweithredol cychwynnol.
- Ceir ymrwymiad hirsefydlog i dalu arian gwobrwyo i Ardaloedd Arbrofi llwyddiannus y Strategaeth Dinasoedd. Cyhoeddodd gweinidogion gronfa wobrwyo o £5 miliwn o leiaf. Hyd yma, nid oes dull talu wedi'i bennu'n derfynol ar gyfer yr arian hwn.
- Mae'r Gronfa Ardaloedd Difreintiedig yn gronfa hyblyg o arian a ddyrennir i wardiau difreintiedig ledled y DU sy'n rhan o'r Strategaeth Dinasoedd. Dewisodd y Gweinidogion ddatganoli'r arian i'r ardaloedd arbrofi. Bydd yr ardaloedd arbrofi yn cael £32m o'r Gronfa Ardaloedd Difreintiedig yn ystod 2007/2008, a swm tebyg yn ystod 2008/2009, a gaiff ei gynyddu yn unol â chwyddiant, i gefnogi'r gwaith o gyflawni eu cynlluniau. Rydym wedi dechrau talu'r arian i'r ardaloedd arbrofi erbyn hyn.