Cynyddiadau blynyddol yng nghyfraddau pensiynau
Faint o wahaniaeth mae’r polisi hwn yn ei wneud?
- Bydd gostwng lefel y terfyn yn lliniaru’r baich ariannol ar gynlluniau budd a ddiffinnir ac yn cydbwyso’r gost a gyflwynir gan y Gronfa Diogelu Pensiynau.
- Bydd yn lliniaru’r trafferthion y mae cynlluniau budd a ddiffinnir yn eu cael wrth geisio dod o hyd i asedion sy’n addas ar gyfer pensiynau sy’n gysylltiedig â LPI.
- I aelodau trefniadau cyfraniadau a ddiffinnir, bydd cael gwared yn llwyr ar y gofyniad i fynegeio pensiynau a delir yn golygu mwy o ddewis o ran y math o flwydd-dal y byddant yn gallu’i brynu. Drwy ddewis blwydd-dal ar gyfradd sefydlog, byddant yn elwa ar bensiwn sy’n dechrau’n uwch nag y byddent wedi’i gael fel arall.
Mynegeio Prisiau Cyfyngedig
Ar hyn o bryd, mae’r gofyniad i fynegeio pensiynau a delir wedi’i osod ar y codiad canran blynyddol yn y Mynegai Prisiau Adwerthu, heb fod yn fwy na 5%. Ar gyfer pob math o gynllun galwedigaethol, mae hyn yn berthnasol i’r holl bensiwn a delir. Ar gyfer Pensiynau Personol Priodol (y term a ddefnyddir ar gyfer pensiynau personol a ddefnyddir i gontractio allan), mae’n berthnasol i’r rhan honno o’r pensiwn yn unig sy’n deillio o’r hawliau contractio allan. Yr enw ar y gofynion hyn yw Mynegeio Prisiau Cyfyngedig, ac maent yn berthnasol i bob pensiwn a delir sy’n deillio o hawliau a gronnwyd ar neu ar ôl 6 Ebrill 1997.
Bydd y newidiadau’n golygu bod yn rhaid i’r cynyddiadau mewn pensiynau galwedigaethol budd a ddiffinnir sy’n deillio o fuddion a gronnwyd ar neu ar ôl y dyddiad y daw`r newidiadau i rym gael eu cynyddu yn ôl y codiad canran blynyddol yn y Mynegai Prisiau Adwerthu, heb fod yn fwy na 2½%. Bydd y gofynion mynegeio ar gyfer pensiynau galwedigaethol cyfraniadau a ddiffinnir a phensiynau personol yn cael eu diddymu’n gyfan gwbl. Fodd bynnag, bydd pobl yn gallu dewis pensiwn sy’n gysylltiedig â’r mynegai o hyd, os ydynt yn mynnu hynny.
Ni fydd pensiynau a delir cyn i’r newidiadau hyn ddod i rym yn cael eu heffeithio.
Mae’r newidiadau i drefniadau cyfraniadau a ddiffinnir a gyflwynwyd yn Neddf Pensiynau 2004 yn berthnasol i bensiynau sy’n deillio o fuddion a gronnwyd ar neu ar ôl 6 Ebrill 1997 yn unig. Mae gofynion mynegeio gwahanol yn berthnasol i fuddion a gronnwyd cyn hynny a bydd y rhain yn cael eu diddymu yn eu tro. Caiff y newidiadau sydd eu hangen i wneud hyn eu cyflwyno er mwyn iddynt ddod i rym ar yr un pryd â’r rhai a wneir yn y Ddeddf Pensiynau.
- I ddysgu mwy am gynlluniau’r Llywodraeth i ddiwygio pensiynau.