Addasu hawliau cyfredol
Diwygiadau i Adran 67 Deddf Pensiynau 1995
- Bydd y darpariaethau newydd yn rhoi mwy o ryddid i gynlluniau ddiwygio’u rheolau er mwyn addasu amgylchiadau sy`n newid a lleihau costau a chymhlethdodau gweinyddol.
- Bydd cynlluniau’n gallu addasu hawliau pensiwn cyfredol aelodau un ai drwy gael caniatâd pob aelod a gaiff ei effeithio, neu drwy ddisodli hawliau presennol â hawliau eraill sy’n gyfwerth â`u gwerth actwaraidd.
- Bydd diogelwch priodol i aelodau: mae`n rhaid ymgynghori â nhw am newid; mae’n rhaid i’r ymddiriedolwyr gymeradwyo pob newid a, lle gwneir newidiadau o dan ddarpariaethau cywerthedd actwaraidd:
- mae’n rhaid cynnal gwerth actwaraidd hawliau pob un aelod a effeithir
- ni ellir trosi hawliau budd a ddiffinnir yn hawliau cyfraniadau a ddiffinnir, ac
- ni ellir lleihau swm unrhyw bensiwn a delir eisoes.
Cefndir
Deddfwyd Adran 67 Deddf Pensiynau 1995 yn sgil un o argymhellion Adroddiad Goode, a gyhoeddwyd ym mis Medi 1993. Cyn hyn, roedd aelodau cynlluniau pensiwn galwedigaethol yn dibynnu ar ymddiriedolwyr yn gweithredu yn eu rôl ymddiriedol o dan ddeddfwriaeth ymddiriedolaeth i warchod eu buddion.
Ym mis Gorffennaf 2002, awgrymodd adolygiad Alan Pickering o reoleiddio pensiynau galwedigaethol bod adran 67 yn ffactor cyfrannol at gyflogwyr yn symud oddi wrth drefniadau pensiwn budd a ddiffinnir i drefniadau pensiwn cyfraniadau a ddiffinnir. Argymhellodd y dylid gadael i gynlluniau newid rheolau i effeithio ar hawliau cronedig gyhyd ag y disgwylir i werth cyffredinol budd aelod fod yr un faint mewn gwerth (er na ellir gwarantu hyn) – gelwir hyn yn `cywerthedd actwaraidd”. Caiff gwerth actwaraidd unrhyw hawliau a gaiff eu dileu neu eu gostwng yn sgil newid rheol ei ddisodli gan ryw hawliau eraill neu drwy ymestyn gwerth actwaraidd cyfwerth o leiaf.
- Darllenwch Adroddiad Pickering (224KB)
yn ein hadran Gyhoeddiadau.
Ym Mhapur Gwyrdd mis Rhagfyr 2002 Symlrwydd, diogelwch a dewis: Gweithio a chynilo ar gyfer ymddeoliad cynigiodd y Llywodraeth ddiwygio adran 67 i ganiatáu cynlluniau i wneud newidiadau ar yr amod na fyddai’r hawliau cronedig a newidir yn cyfrif am fwy na chanran benodol o gyfanswm hawliau cronedig aelod – awgrymwyd 5% fel terfyn `de minimis”.
Ym mis Mehefin 2003 cynghorodd y Llywodraeth yn Gweithio a chynilo ar gyfer ymddeoliad: Gweithredu ar bensiynau galwedigaethol bod y diwydiant pensiynau wedi gwrthod cynnig y Papur Gwyrdd ar y sail ei fod yn rhy gymhleth ac yn rhy anodd ei weinyddu; roedd y terfyn 5% yn annigonol. Yn hytrach, cynigiodd y Llywodraeth ddiwygiad tebyg i lwybr Pickering ond â diogelwch ychwanegol i aelodau (mae’n rhaid dweud wrth aelodau am effaith newid arfaethedig a rhoi cyfle iddynt gynnig sylwadau amdano, dim newidiadau o ran budd a ddiffinnir i gyfraniadau a ddiffinnir, a dim gostyngiad yn swm pensiwn a delir eisoes).
Sut caiff gwerth actwaraidd hawliau cronedig aelod a effeithir ei gyfrifo?
Mae cyfrifo gwerth actwaraidd hawliau pensiwn cronedig aelodau mewn cynlluniau pensiwn budd-dal a ddiffinnir wedi bod yn nodwedd sefydledig mewn deddfwriaeth pensiynau. Er enghraifft, os bydd aelod am drosglwyddo’i hawliau o un cynllun i gynllun arall, neu pan gaiff aelodau eu trosglwyddo gyda’i gilydd ar ôl cyfuno corfforaethol, mae angen cyfrifo gwerth yr hawliau cronedig.
Bydd y Llywodraeth, mewn cydweithrediad â phroffesiwn yr actwariaid, yn sicrhau y rhoddir methodoleg briodol ar waith i sicrhau y rhoddir gwerth priodol ar hawliau cyfredol aelodau ar adeg unrhyw newid.
A fydd unrhyw un mewn sefyllfa waeth ar ôl trosi cynllun?
Bydd gofynion cywerthedd actwaraidd yn golygu y caiff gwerth actwaraidd hawliau cyfredol pob un o aelodau’r cynllun sy’n cael ei effeithio ei gynnal, ar adeg y trosi.
- Dysgwch fwy am gynlluniau’r Llywodraeth i ddiwygio pensiynau.