Siarter y Cwsmer yr Uned Adfer Iawndal
Mae’r Uned Adfer Iawndal (UAI) yn rhan o’r Adran Gwaith a Phensiynau. Ein swyddogaeth ni yw adfer budd-daliadau a dalwyd yn sgil damwain, anaf neu afiechyd o iawndal a ddyfarnwyd ar gyfer yr un ddamwain, anaf neu afiechyd. Mae’r UAI yn adfer, ar ran yr Adran Iechyd, costau ysbyty ar gyfer trin anafiadau sy’n deillio o ddamweiniau ffordd (Adfer Costau’r GIG). Mae’r UAI hefyd yn rheoli Gwasanaeth Anfon Llythyrau Swmp Ymlaen. Gwasanaeth yw hwn a gynigir yn bennaf i sefydliadau masnachol i anfon gwybodaeth fuddiol ymlaen i gwsmeriaid nad oes ganddynt gyfeiriad cyfredol ar eu cyfer.
Lleolir yr Uned Adfer Iawndal yn Washington, Tyne a Wear. Ewch i manylion cyswllt i weld ein cyfeiriad post a’n rhifau ffôn.
Mae Siarter y Cwsmer yn rhoi gwybod i chi am safon y gwasanaeth y ceisiwn ei darparu yn ein gwaith dyddiol. Mae hefyd yn rhoi gwybod i chi sut y gallwch roi adborth i ni a beth i’w wneud os aiff pethau o’i le yn eich trafodion â ni.
Achrediad Nod Siarter
Fel rhan o’n nod i wella ein gwasanaeth yn barhaus, cyflawnodd Rheoli Dyled achrediad Nod Siarter yn 2006. Mae’r Uned Adfer Iawndal yn rhan o sefydliad Rheoli Dyled yr Adran Gwaith a Phensiynau.
Mae’r Nod Siarter yn un o safonau’r Llywodraeth sy’n annog:
- arloesedd
- gwella gwasanaeth
- atebolrwydd
- gosod safonau ar gyfer sefydliadau sy’n darparu gwasanaethau cyhoeddus.
Mae’n ymwneud ag adeiladu ar ein gwelliannau i wasanaethau cwsmeriaid. Bydd yn ein helpu i fesur y gwasanaeth cwsmeriaid rydym yn ei ddarparu ac adnabod meysydd ar gyfer gwella.
Ein cyfrifoldebau i chi
Wrth gyflwyno’n gwasanaethau byddwn yn:
- Gosod safonau clir er mwyn i chi wybod beth i’w ddisgwyl
- Cyfathrebu’n glir ac yn effeithiol ac mewn iaith eglur
- Gwneud ein gwasanaethau’n hawdd i’w defnyddio, yn enwedig i’r rhai sydd ag anghenion penodol
- Trin pobl yn deg a gyda pharch
- Trin yr hyn y dywedwch wrthym yn gyfrinachol
- Gwneud pethau’n well mor gyflym ac effeithlon â phosibl, os ânt o’i le.
Eich cyfrifoldebau i ni
Gallwch chi ein helpu ni i roi gwasanaeth da drwy:
- Roi eich cyfeirnod i ni Pan fyddwch yn cysylltu â ni
- Rhoi rhif ffôn i ni lle gallwn gysylltu â chi
- Rhoi gwybodaeth lawn a chywir i ni pan ofynnwn amdani
- Dweud wrthym am unrhyw newidiadau a allai, yn eich barn chi, gael effaith ar ein gweithredoedd.
Cyfrifoldebau i’w rhannu
Gallwn helpu’n gilydd drwy:
- Barchu’n gilydd a dangos amynedd a dealltwriaeth o sefyllfa’n gilydd
- Bod yn foesgar ac yn gwrtais wrth ddelio a’n gilydd.
Rydym am roi’r gwasanaeth gorau posibl i chi, ac rydym bob tro’n ceisio gwella. Bydd gwrando ar eich safbwyntiau chi yn ein helpu i wella. Os hoffech gynnig sylwadau am y gwasanaeth rydym wedi’i roi i chi, neu os ydych o’r farn ein bod wedi gwneud rhywbeth yn anghywir neu’n dda, cysylltwch â’r Rheolwr Gwasanaeth Cwsmeriaid perthnasol yn yr Uned Adfer Iawndal.
Darllenwch fwy am hyn yn cwynion a chanmoliaeth