Amrywiaeth a chydraddoldeb
Mae`r Adran Gwaith a Phensiynau wedi ymroi i ddarparu gwasanaethau sy'n croesawu amrywiaeth ac sy'n hyrwyddo cyfle cyfartal. Fel cyflogwr, rydym wedi ymroi i gydraddoldeb ac i werthfawrogi amrywiaeth yn ein gweithlu. Ein nod yw sicrhau y caiff yr ymrwymiadau hyn, a atgyfnerthir gan ein Gwerthoedd, eu hymgorffori yn ein harferion gwaith o ddydd i ddydd gyda'n holl gwsmeriaid, ein cydweithwyr a'n partneriaid.
Cynlluniau cydraddoldeb
Ar 1 Rhagfyr 2006, cyhoeddodd yr Adran Gwaith a Phensiynau ei chynlluniau cydraddoldeb anabledd a rhyw cyntaf gydag adroddiad blynyddol ar gynnydd ein cynllun cydraddoldeb hiliol. I groesawu pob agwedd ar amrywiaeth a chydraddoldeb, rydym yn cynnwys ein hymrwymiad i oedran, tueddfryd rhywiol a chrefydd neu gred.
I'n staff
Rydym o'r farn ei bod yn bwysig y gall ein holl bobl gyfrannu at gyflawni amcanion yr Adran. I hyrwyddo hyn, mae gan yr Adran ystod o grwpiau rhwydweithio i staff ar gyfer oedran, anabledd, rhyw, tueddfryd rhywiol a chydbwysedd gwaith a bywyd. Mae gan bob grŵp uwch reolwr yn hyrwyddwr.
Mae'r Adran yn darparu ymwybyddiaeth am faterion amrywiaeth i'w staff drwy gynnyrch dysgu a datblygu, fel y pecyn Amrywiaeth, sy'n ymdrin â chyfle cyfartal yn ogystal â'r holl strandiau yn ymwneud ag amrywiaeth.
Mae'r Adran wedi ymroi i godi ymwybyddiaeth am faterion amrywiaeth. Er enghraifft, fel rhan o'r ymdrech hon, mae`r Adran:
- yn gweithio mewn partneriaeth â sefydliadau allanol eraill fel y Fforwm Cyflogwyr ar Anabledd a`r Fforwm Cyflogwyr ar Oedran,
- yn aelod o Race for Opportunity ac Opportunity Now, sy'n ymgyrchoedd Busnes yn y Gymuned, ac
- yn Hyrwyddwr Amrywiaeth ar gyfer Stonewall, y sefydliad sy'n gweithio i sicrhau cydraddoldeb cyfreithiol a chyfiawnder cymdeithasol i lesbiaid, dynion hoyw a phobl ddeurywiol.
I'n cwsmeriaid
Mae'r Adran wedi ymroi i gynnig y gwasanaethau gorau posibl i'w holl gwsmeriaid, gan adlewyrchu eu gofynion amrywiol. Mae Deddf (Diwygio) Cysylltiadau Hiliol 2000 a Deddf Gwahaniaethu ar sail Anabledd 1995 yn rhoi cyfrifoldebau penodol ar yr Adran fel awdurdod cyhoeddus i archwilio'i holl swyddogaethau am effaith posibl hil ac anabledd yn ôl eu trefn, ac i sicrhau ein bod yn hyrwyddo cydraddoldeb.
Wrth lunio polisi
Mae'r Adran yn ymgynghori'n eang â grwpiau diddordeb ar bob menter sylweddol newydd, er enghraifft â chymunedau ethnig lleiafrifol mewn meysydd polisi sy'n debygol o gael effaith sylweddol ar y cymunedau hynny. Mae'r Adran yn cymryd rhan yn rheolaidd mewn ymarferion ymgynghori ar draws y Llywodraeth, er enghraifft ar y ddeddfwriaeth anabledd a ddaeth i rym ym mis Hydref 2004.
Mae Deddf (Diwygio) Cysylltiadau Hiliol 2000 yn rhoi dyletswydd gyffredinol ar awdurdodau cyhoeddus i:
- ddileu gwahaniaethu ar sail hil
- sicrhau cyfle cyfartal, a
- hyrwyddo cysylltiadau hiliol da.
Mae'r adroddiad Gwireddu Cydraddoldeb yn yr Adran Gwaith a Phensiynau 2005 i 2008 yn rhoi manylion am sut gynnydd y mae'r Adran yn ei wneud o ran rhoi'r Ddeddf ar waith.
Daeth Deddf Cydnabod Rhyw 2004 i rym ym mis Ebrill 2005. Sefydlodd y Ddeddf Banel Cydnabod Rhyw sydd â`r pŵer i benderfynu ar geisiadau gan bobl drawsrywiol sy'n ceisio cydnabyddiaeth gyfreithiol yn eu rhyw newydd. Am ragor o wybodaeth neu am becyn cais, ewch i wefan y Panel Cydnabod Rhyw.