Rheoli Achosion Cwsmeriaid
Mae Rheoli Achosion Cwsmeriaid (CCM) yn cefnogi ymagwedd gyson i'r broses gwneud penderfyniadau mewn achosion o hawlio Lwfans Byw i'r Anabl (16 oed a throsodd) a Lwfans Gweini.
Rydym yn anelu at wella:
- y profiad ar gyfer ein cwsmeriaid â'n staff
- cydberthnasau â'n partneriaid
- effeithlonrwydd ein gwasanaethau.
Ymagwedd y CCM
Mae ymagwedd y CCM:
- Yn caniatáu i gwsmeriaid ddarparu gwybodaeth sy'n disgrifio eu hanghenion gofal a symudedd yn gywir ac i'r lefel o fanylder y gofynnwyd amdano gan y Swyddog Penderfyniadau.
- Yn defnyddio ffurflen gais sy'n symlach i'w chwblhau – a ddatblygwyd gan Fforwm Ymgynghori'r DCS a chynrychiolwyr grwpiau lles eraill.
- Yn annog ymagwedd gyson i wneud penderfyniadau drwy ddarparu arweiniad meddygol ac arweiniad ar gasglu tystiolaeth gynhwysfawr a chyfoes i Swyddogion Penderfyniadau.
- Yn cynnwys esboniadau mwy clir ar benderfyniadau.
- Yn hyrwyddo cysylltiad mwy uniongyrchol rhwng Swyddogion Penderfyniadau a chwsmeriaid.
Cynnydd hyd yn hyn
Cafodd yr ymagwedd CCM ei phrofi yng Nghanolfannau Trafod Budd-daliadau Bootle, Manceinion a Warbreck House fo fis Medi 2005 i fis Mawrth 2006.
Mae'r profion wedi dangos canlyniadau calonogol iawn:
- Cynnydd yn nifer yr achosion a benderfynwyd ar sail tystiolaeth y cwsmer yn unig
- Lleihau costau casglu tystiolaeth.
- Llai o geisiadau yn gofyn am esboniad ar benderfyniad.
- Llai o apeliadau.
- Llai o benderfyniadau yn cael eu newid mewn apêl.
- Cymeradwywyd y gwelliannau a wnaed i'r ffurflen gais, canllaw feddygol, a'r dull o hysbysu penderfyniadau a chynnydd mewn cysylltiadau â chwsmeriaid.
Nid oedd gwahaniaeth arwyddocaol yn nifer yr achosion y dyfarnwyd lwfans iddynt ond roedd mwy o benderfyniadau yn seiliedig ar y wybodaeth yn y ffurflen hawlio yn unig.
Dengys y canfyddiadau duedd tuag at ofyn am dystiolaeth o'r ffynhonnell fwyaf priodol.
Beth sy'n digwydd nawr?
Rydym yn gwneud mwy o waith ar ganllawiau meddygol, casglu tystiolaeth a'r broses yn gyffredinol – oherwydd awgrymai'r profion y gellid gwneud mwy o welliannau yn y meysydd hyn. Rydym yn parhau i weithio'n agos gyda'n partneriaid mewnol ac allanol allweddol.
Yn benodol, mae gwaith yn mynd rhagddo i ddatblygu hysbysiad sy'n cynnwys y rheswm dros y penderfyniad.
Rydym yn bwriadu gweithredu'r ffurflen hawlio well yn genedlaethol o ddiwedd mis Ebrill 2007.
