Gweithio ar gyfer cyrff cyhoeddus
Mae gwahanol fathau o gyrff cyhoeddus, o'r rhai cwbl ymgynghorol i'r rhai sy'n darparu swyddogaethau gweithredol.
Oherwydd yr amrywiaeth enfawr o benodiadau cyhoeddus, gall y sgiliau a'r rhinweddau mae eu hangen amrywio'n aruthrol.
Bydd rhai sgiliau'n hanfodol a bydd eraill yn ddymunol. Manylir ar hyn yn yr hysbyseb a/neu'r pecyn gwybodaeth. Bydd angen i chi astudio'r sgiliau mae eu hangen ar gyfer swydd benodol yn fanwl cyn i chi benderfynu a ydych chi am wneud cais.
Sgiliau cyffredinol
Mae'r sgiliau canlynol yn debygol o fod yn bwysig ar gyfer y rhan fwyaf o benodiadau:
- Ymroddiad a pharodrwydd i roi'r amser angenrheidiol i baratoi ac i gymryd rhan weithgar yng ngwaith y corff
- Synnwyr cyffredin a'r gallu i asesu effaith penderfyniadau ar bob rhan o'r gymuned
- Annibyniaeth a pharodrwydd i ofyn cwestiynau neu i wirio pam mae llwybr penodol yn cael ei argymell ar gyfer gweithredu
- Meddwl clir a'r gallu i asesu sefyllfa'n gyflym ac yn ddiduedd, i weld y darlun ehangach
- Y gallu i wrando yn ogystal â mynegi'ch barn; ac i ddylanwadu ar a delio â phob grŵp, gan gynnwys arbenigwyr o bosibl
- Sgiliau cydweithio a'r gallu i weithio mewn grŵp, efallai drwy brofiad o weithio ar bwyllgor neu dîm prosiect. Gallai'r profiad hwn fod yn amlwg drwy eich gyrfa neu drwy amrywiaeth o ffyrdd eraill fel gwaith gwirfoddol. Efallai'ch bod wedi bod yn llywodraethwr ysgol, yn aelod o ymddiriedolaeth dai, Siambr Fasnach neu'n ymwneud â charfan bwyso?
